په‌پووله مۆره‌کان
من له بارانه‌که‌ی ئاسمان بێزار بووم
ئێستا ته‌نها به بارانی ناخم ته‌ڕ ده‌بم
گوڵه‌کانی ده‌شتی سنگم مۆرن هه‌ر له په‌پووله‌کانی باخه‌که‌ی دایکم ده‌چن
من ده‌مێکه له‌به‌ر لیزمه‌ی بارانێکا هێدی هێدی نه‌ڕۆشتووم
من خه‌ریکه نه‌ک سیمای په‌پووله مۆره‌کان به‌ڵکۆ سیمای دایکیشمم له بیر ده‌چێته‌وه
له سنگم مه‌ڕوانه‌که پێ ده‌چی له گؤشت و خوین دروستکرابێ
گه‌ر سنگم بکه‌یته‌وه له نیویدا ده‌شتێکی پانو به‌رین هه‌یه
پڕن له په‌پووله مۆره‌کان
له داره شۆره‌کان
که هه‌رده‌م سوجده ده‌به‌ن
هه‌ر یه‌که‌و حکایه‌تێکیان لایه
جیهانه‌که‌ی سنگی من له شاره هه‌نگ ده‌چێ
شیلله‌ی تاڵ و شیرینیشی تیدایه
زۆر له کچه سه‌رخۆشه‌کانی تۆکیۆ حه‌ز ده‌که‌ن له‌سه‌ر سنگمدا بژین
شیلله‌ی هه‌نگوینه‌کان بخۆن
به‌س نازانن گه‌ر درزێك ببێته سنگم وون ده‌بن له ده‌شتی کاکی به کاکی
که پڕن له و خه‌ونانه‌ی که ئه‌وان هه‌رگیز لیی تێناگه‌ن.
پڕن له بلیتی دڕاوی سینه‌ما دلشاد
له ته‌وقه شکاوه‌کانی دایکم
پڕن له کۆتری ته‌ره‌ی ئێرانی
ترساو له ئاسمانی جه‌نگ
پڕن له گۆرانی ته‌واونه‌کراو
له تابلۆی ڕه‌نگ نه‌کراو
ئه‌و کچه‌سه‌رخۆشانه‌ی که ته‌نها خه‌نده‌کانی من ده‌لێسنه‌وه
و فرمێسکه‌کانم نابینن
نازانن چی له نێو جانتای سنگمدا هه‌یه؟
په‌پووله مۆره‌کان ده‌که‌نه ته‌وقه بۆ قژیان
سمکۆ ئه‌حمه‌د
تۆکیۆ ۲٠۱۲
Comments